Ibigo by’amashuri abanza n’ayisumbuye bya Diyosezi Gatolika ya Kabgayi bigiye guhurira mu birori byo guhimbaza umunsi w’umuco mu mashuri ku nshuro ya kabiri.
Ni umunsi uzizihizwa ku wa 26 Gashyantare 2026, ukizihirizwa mu ishuri rya Ecole Sainte Bernadette Kamonyi (ESB Kamonyi) ku nsanganyamatsiko igira iti “Dukoreshe, tunoze Ikinyarwanda hose”.
Padiri Majyambere Jean d’Amour, umuyobozi wa Ecole Saint Bernadette Kamonyi, ari nabo bazakira ibirori byo guhimbaza umunsi w’umuco mu mashuri ya Diyosezi Gatolika ya Kabgayi mu kiganiro na UBUREZI.RW yavuze ko bakomeje imyiteguro yo kwakira ibigo 32 by’amashuri gatolika abarizwa muri diocèse ya Kabgayi, aho biteganyijwe ko bizitabirwa n’abanyeshuri 1,050.
Yagize ati “Nibiyongera kubo dusanzwe tubana n’abatumirwa turateganya kuzaba tugera ku bantu 3,105. Turabitegura ku mpande zose, tureba aho ibirori bizabera turimo turabinoza neza, tureba icyo tuzakiriza abana n’ababaherekeje ibirori birangiye.”
Padiri Majyambere yavuze ko kuri uwo munsi wo guhimbaza umuco hazakorwa ibikorwa birimo umutambagiro n’akarasisi, abana bagaragaza ibikoresho gakondo bya kinyarwanda n’umuco ndetse n’ibirori ibirimo; imbyino, imikino gakondo, ibyivugo, ibisakuzo, umurishyo w’ingoma n’ibindi.
Ati “Abana bagerageje kwiga no gucukumbura umuco nyarwanda, amashuri atandukanye azajya agerageza gucamo atwereka umuco nyarwanda.”
Akomeza agira ati “Icyo bibafasha [Ibikorwa by’umuco] mbere na mbere ni abana bato, bibafasha kugenda bacukumbura umuco nyarwanda. Ese Abanyarwanda babyinaga bate? Bahamirizaga bate? Ariko nk’abana bato ubona ko bibafasha gufunguka mu mutwe n’imyitozo bakora harimo ka siporo.”
Ikigo cya Ecole Saint Andre Gitarama, kibarizwa mu Karere ka Muhanga ni kimwe mu bigo birenga 30 bizitabira.
Hormisdas Twagirumukiza uyobora iri shuri nawe avuga ko bari kwitegura neza ko mu cyumweru abanyeshuri bazaserika kuko bitoza gatatu mu cyumweru ko kandi bageze kure bimenyereza ngo bazaseruke neza.
Ati “Twebwe kuri uwo munsi tuzerekana umushagiriro, bamwe bavuga umushagiriro abandi umushayayo, niyo mbyino tuzerekana nk’ishuri rya Ecole Saint Andre Gitarama.”
Uyu muyobozi w’Ikigo cy’Ishuri asobanura ko kuba abanyeshuri bagira umunsi wo guhimbaza umuco mu mashuri muri Diyosezi ya Kabgayi, bituma abanyeshuri badatwabwa n’amasomo bakaba bakwibagirwa umuco gakondo.
Ati “Abana bigiramo umuco nyarwanda kandi burya mu muco niho hagendera indangagaciro zose ziranga Igihugu, harimo uburere… Twebwe mu kigo cyacu n’ubundi buri gihembwe dukora icyo bita ‘Igitaramo cy’Umuco Nyarwanda’ abarimu babishinzwe bategura abana ndetse bagafatanya n’abaturage batuye mu nkengero z’Ishuri tukaba twazana ibikoresho byarangaga abanyarwanda bakera hanyuma tukabyerekana abana tukabibasobanurira.”
Guteza imbere umuco mu mashuri ni imwe mu ntego za guverinoma y’u Rwanda, mu rwego rwo kubaka umunyarwanda ubereye u Rwanda rwifuzwa.
Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) iherutse gutangiza amarushanwa ku Kinyarwanda, umuco, indangagaciro n’umurage by’u Rwanda mu mashuri yisumbuye.
UBUREZI.RW
