Abanyeshuri 20 ba TTC Mururu bakoze urugendoshuri rugamije gufasha iri shuri guca ukubiri no kujya ku isoko guhaha, ahubwo bakaba ikigega cy’ibiribwa.
Ni urugendoshuri rwakorewe kuri College Saint Martin Hanika muri Diyosezi ya Cyangugu, ku wa 18 Ukuboza 2025, hagamijwe kureba intambwe yatewe mu buhinzi n’ubworozi burimo ubw’amatungo magufi nk’inkoko, ingurube n’amasazi y’umukara akoreshwa mu nyunganiramirire zihabwa amatungo.
Aba banyeshuri 20 bahagarariye abandi ba TTC Mururu bari baherekejwe n’umuyobozi w’ishuri Frere Elie Twagirayezu n’umwarimu ukurikirana ibikorwa by’iterambere by’ishuri, Komezusenge Dieudonne.
Uru rugendoshuri intego yarwo ni kureba ibikorwa by’iterambere bishingiye ku bworozi n’ubuhinzi bw’amatungo magufi, ingurube, inkoko, ubworozo bw’amasazi y’umukara akoreshwa mu nyunganira mirire y’amatungo (Protein), ubuhinzi bukorewe mu nzu “green house”.
TTC Mururu yateguye uru rugendo igamije kunoza imikorere yayo no kurebera hamwe uko abanyeshuri bitabira cyangwa bashishikarizwa kwitabira ibikorwa by’iterambere, ndetse bakanafashwa kuba umusemburo w’impinduka muri gahunda y’iterambere rirambye hitabwa cyane kubidukikije n’ubuhinzi bwifashisha ikoranabuhanga.
Bamwe mu banyeshuri bitabiriye uru rugendoshuri bashimye intambwe yatewe n’iri shuri basuye rya College Saint Martin Hanika bahiga nabo kugaragaza impinduka biciye mu matsinda babamo ku ishuri, ni mugihe kandi abanyeshuri bari kwiga uburyo bahinga ibihumyo.
Mbere yuko abanyeshuri bajya mu biruhuko bw’igihembwe cya mbere cy’umwaka w’amashuri wa 2025-2026 buri wese yatahanye imigina yibihumyo igera kuri 2.
TTC Mururu ni ishuri rya Diyosezi Gatolika ya Cyangugu, aho riyoborwa w’abafurere baba Mariste.
Ni mugihe College Saint Martin Hanika nayo ari ishuri ryigenga rya Diyosezi Gatolika ya Cyangugu.
INEZA Marianne/UBUREZI.RW
